மனங்களில் மணம் பரப்பும் மனமகிழ் மன்றம் FRC (Fathima Recreation Club)

பசிக்காய் பழம் தேடிய காகம், பழத்தின் ருசியைக்கண்டவுடன் அமர்ந்து, ருசித்து, ரசித்து,உண்டு பசியாறி, அதன் விதையை நிலத்தில் பதித்துச்சென்றது. விழுந்த விதை முளைத்து, துளிர்த்து, நிலைத்து, கிளைத்து இன்று வேரூன்றி ஆகா, என்ன ருசி, இதிலிருந்து இன்னொரு பழத்தை பறித்து, ருசித்து, பின் விதைத்து பெருக்கலாமே! என எண்ண வைத்தது. ஆம் அந்த பசிக்காய் பலமெனும் நட்பைத்தேடிய காகங்கள் தாம் இம்மனமகிழ் மன்றத்தார். இவர்களின் இனிமை மிகு பயணம் இதனைப் படிப்பவர்களுக்கு சுவாரஸ்யமாய், சுவை மிகுந்ததாய் இருப்பதோடு செயலைத் தூண்டுவதாயும் அமையும் என்பதில் சந்தேகமில்லை. சின்னஞ்சிறுவர்கள் பலிபீடத்தைச் சுற்றி சுற்றி வந்து இறைபணியாற்றி வந்தனர் . எஞ்சிய நேரத்தில் ஆலய வளாகத்தில் விளையாடி மகிழ்ந்தனர். பீட சிறுவர்களாக இருக்கும் வயதைக் கடந்தவுடன், ஆலயம் கற்றுத்தந்த ஆன்மீகமும் தொடர வேண்டும்; ஆலயத்திற்குள் அரும்பணியும் ஆற்ற வேண்டும்;. இச்சூழலில் 1976-ம் ஆண்டு ஏப்ரல் 11-ம் நாள் அன்று அப்போது கோவை, காந்திபுரம் புனித பாத்திமா ஆலயப்பங்கு தந்தை அருட்தந்தை ஏசுதாஸ் அடிகளார் அவர்கள் முன்னிலையில், அன்றைய கப்புச்சின் மாநில அதிபராக இருந்த அருட்தந்தை ஜோனத்தான் அடிகளார் தலைமையேற்க 12 இளம் வாலிபர்களை உறுப்பினர்களாகக் கொண்டு தொடங்கப்பட்டதுFRC ( Fathima Recreation Club) மனமகிழ் மன்றம் இன்று 40 ஆண்டுகளைக்கடந்து அடுத்த தலைமுறையின் நுழைவோடு இம்மமன்றப் பயணம் தொடர்ந்து கொண்டு இருக்கின்றது.

இறைவாக்கு வாழ்வாக இணைந்த செயல்பாடு

மத்தேயு நற்செய்தி 25:35 - 40 இறைவார்த்திகளில் கூறப்பட்டுள்ளது போல சிறையில் இருப்போரை காண்பதும், பசித்திருப்போர்க்கு உணவளிப்பதும், நோயுற்றவர்களை காண்பதும் இறைவனுக்கு செய்யும் சேவை என்பதால் குடும்பமாக மன்றத்தார் அனைவரும் இணைந்து இப்பணிகளை ஆண்டுதோறும் அயராது செய்து வருகின்றனர். இதனால் பெண்கள் தங்கள் பங்களிப்பை குடும்பத்தோடு இனைந்து கொடுக்க முடிகிறது. குழந்தைகளும் தம் இளம் பருவத்தில் இருந்தே தம் தாய் தந்தையர் இணைந்து பணியாற்றுவதை காணும்போது தம் இளம் பருவத்திலிருந்தே தாங்களும் தானாகவே அந்த உதவும் இறைவார்த்தையை வாழ்வாக்கும் நற்பண்பினை பெறுகின்றனர். ஆயிரம் வார்த்தைகளை விட ஒற்றை சொல் வலிமை பெற்றதன்றோ? அனைத்திற்கும் உச்சமாக சென்ற ஆண்டு சென்னை> கடலூர் வெள்ளத்தால் தத்தளித்தபோது மன்றத்தாரின் குடும்பங்கள் இணைந்து காலை 8 மணி முதல் மாலை 8 மணி வரை 4000 சப்பாத்திகள் தயாரித்து அதனோடு அத்தியாவசிய தேவைகளையும் இணைத்து 2 வண்டிகளில் ஏற்றி மன்றத்தாரே நேரில் சென்று கொடுத்து வந்தது நெஞ்சை விட்டு நீங்காத நிகழ்வு.